'Mae ffermio wrth galon y gymuned; os yw'r ffermwr yn diflannu mae'r gymuned, yr iaith Gymraeg, y diwylliant, a phopeth arall sy'n dod yn ei sgil, yn diflannu.'
Mae'r gyflwynwraig a'r ffermwr Meinir Howells yn ffigwr amlwg yn y byd amaeth yng Nghymru. Mae hi hefyd yn llais blaenllaw dros y diwydiant amaethyddol. Yn y cofiant hwn, mae hi'n trafod yr heriau sy'n wynebu cefn gwlad, yn edrych yn ôl i'r gorffennol ac ar y ffordd ymlaen.
Wedi ei magu ar fferm ei rhieni ger Llandeilo, roedd Meinir yn fridiwr defaid Balwen llwyddiannus pan gyfarfu a'i gŵr Gary mewn arwerthiant defaid cyn priodi yn 2014. Roedd yn aelod gweithgar o Glwb Ffermwyr Ifanc Llanfynydd ac mae hi wedi ennill gwobrau am ei gwasanaeth i'r byd amaethyddol.
Yn ogystal â chyflwyno straeon am amaeth yng Nghymru a thu hwnt ar y gyfres Ffermio ar S4C, mae Meinir hefyd yn cyflwyno rhaglen Y Sioe Fawr ar S4C ac wedi cyflwyno a chyfarwyddo rhaglenni bwyd ac amaeth ar y BBC. Oddi ar y sgrin, mae'n treulio ei hamser gyda'i gŵr Gary a'u plant, Sioned a Dafydd, yn gofalu am y defaid a'r gwartheg yn Shadog, fferm brysur y teulu ger Llandysul.
