'Nôl yng ngaeaf 1947, mentrodd llanc ifanc, deunaw oed - o'i gartref a'i gymuned ym mherfeddion Kingston, Jamaica - dros y môr i'r 'Famwlad'.
Wedi tair wythnos fel teithiwr cudd ar fwrdd llong yr Almanzora, cyrhaeddodd Neville Howard ben ei daith, ar 21 Rhagfyr 1947. Ymhen amser, daeth i Gymru fach - gan ymgartrefu yn Nociau Caerdydd (neu 'Fae Teigr'). Yma y ganed ac y magwyd un o'i feibion, Wayne Morris Howard.
Yn y gyfrol unigryw hon, cawn olwg ar hanes a gwreiddiau Wayne a'i deulu. Cawn flas ar ei fagwraeth a'i blentyndod yn hen Fae Caerdydd; yr heriau yn sgil hiliaeth a rhagfarn; ei frwydr â'i iechyd meddwl, a'r cwmni a'i gwnaeth yn ddi-waith; ei daith ryfeddol i ddysgu, ac i addysgu, Cymraeg....Ond hefyd - ac yn bwysicaf oll - cawn flas ar ei ddygnwch yn wyneb awelon croes bywyd; ei gariad diddarfod at ei deulu a'i ffrindiau a'i gyd-ddyn; a'i awch i ysbrydoli pobl.
