Cludiant am ddim am archebion dros £20
Hafan
Os yn archebu o’r tu allan i’r DU mae’n bosib y bydd yn rhaid i chi dalu treth a chostau dosbarthu eraill ar ben ein costau postio ni.

TitleCy

Addasiad "llawn gobaith" ar gyfer yr arddegau cynnar gan Caryl Lewis

Yr wythnos hon cyhoeddir nofel gan yr awdur a’r sgriptwraig Caryl Lewis, sef Haf o Hud. Dyma’r ail nofel i Caryl ei hysgrifennu ar gyfer plant 9 i 13 oed sy’n pontio oed cynradd ac uwchradd.

Meinir Wyn Edwards sydd wedi addasu’r gyfrol hon yn ogystal â chyfrol gyntaf Caryl Lewis â Macmillan, sef Hedyn. Meddai Meinir Wyn Edwards:

“Mae Caryl Lewis wedi llwyddo unwaith eto i greu byd hudolus, llawn dychymyg ar gyfer plant. Mae hi wedi bod yn fraint aruthrol i addasu Haf o Hud.”

Disgrifir Haf o Hud yn nofel sy’n “codi calon ac yn llawn gobaith,” gan yr awdur Katherine Woodfine.

Meddai Caryl Lewis:

‘Pleser pur oedd gweithio gyda Meinir wrth iddi addasu Haf o Hud. Dwi wrth fy modd y bydd plant Cymru yn cael dod i adnabod Abi a’i thad. Mae hi’n stori am deulu ac am yr hud sydd i’w ddarganfod yn y llefydd mwya di- nod. Dwi’n credu bod angen ychydig bach o hud yn y byd sydd ohoni!’

Ar ôl trychineb o sioe, mae tad Abi yn penderfynu gadael y byd hud a lledrith. Roedd mam Abi yn gonsuriwr o fri. Ond mae hi wedi mynd, a dyw pethau ddim yr un fath. Ond un diwrnod daw Abi o  hyd i hen lyfr swynion ei mam sy’n dod â llawenydd a rhyfeddodau i’r gymuned gyfan. Dyma stori ryfeddol am bŵer cymuned, sy’n rhoi cyfle i bawb serennu.