Dyma hunangofiant un o gewri cerddorol Cymru sydd wedi cynhyrchu rhai o'r recordiau gorau a gyhoeddwyd yn y Gymraeg erioed.
Yn y 60au daeth Endaf Emlyn i amlygrwydd trwy Brydain wrth ganu ar label Parlophone, yr un label â'r Beatles ar y pryd, ond troi'n ôl at y Gymraeg fu ei hanes, gan gyhoeddi ei albwm gyntaf, 'Hiraeth', yn 1973. Yn 1974 cyhoeddwyd ei record 'Salem' ar label Sain, sy'n cael ei chydnabod fel un o'r recordiau gorau yn y Gymraeg erioed. Aeth ymlaen wedyn i ysgrifennu ar gyfer operâu roc, chwarae gyda Injaroc a Jîp, cyn cyhoeddi recordiau nodedig pellach fel 'Dawnsionara'.
Ond yn ogystal â rhoi mewnolwg dadlennol i'w yrfa gerddorol a chyfryngol, mae Endaf yn agor ei galon ar nifer o faterion personol yn y gyfrol hon. O'r ysfa i ddianc oddi cartref yn blentyn i drafod iselder sydd wedi ei lethu'n aml, mae'n agor y llen ar faterion na thrafododd yn gyhoeddus o'r blaen.
Fe geir sawl deuoliaeth ar y daith, o'r portread arbennig o fywyd crefyddol ym Mhwllheli i gyffro'r sîn roc ddinesig ym Mae Caerdydd. O gyfnodau o blesio a phechu dilynwyr y sîn roc yn eu tro, mae'r awdur yn trafod talp o hanes diwylliannol a cherddorol Cymru. Ac yn clymu'r cyfan maer llun enwog hwnnw gan Curnow Vosper o Salem, sydd wedi bod yno yn ei ddilyn drwy gydol eo oes.
